Kevanek ( )

1) Kevanek ji bo wan ravekirinan dihê bikarînan ku tu têkilîyeka wan bi avahîya komekê ve tune ye. Ango tu girêdaneka naveroka hundirê kevanekê ya rêzimanî li gel komekê tune ye. Hebûna wê ji bo zelalkirina maneyê ye. Ji ber wê yekê ye Celadet Bedirxan ji bo kevanekê weha dibêje:

“Kevanek li pêşî û paşiya wan pirsan tête danîn ko bi sebebekê ketine komekê û heke jê hatine hilanîn mana komekê ne kêm dibe û ne jî diguhêre.”

Bedir-Xan, C.A, “Bingehên Gramêra Kurdmancî-2”, Hawar, hejmar: 28

 “Belayê (wê nexweşiya xedar) ez gelekî êşandim.”

Bedir-Xan, C.A, “Bingehên Gramêra Kurdmancî-2”, Hawar, hejmar: 28

Me ji bo anketa xwe ya îsal, li gel 25 000 mirovan (13 000 jin û 12 000 mêr) têkilîyên piralî danîn. FKKS (Federasyona Komeleyên Kurdistanê li Swêdê) di sala 1981ê da ava bû.

2) Xal, bangnîşan û pirsnîşan piştî kevanekê dihên danîn.

Ew çêlikê maran e (bêjehr nabe). Wî porê xwe jê kir (qusand).

3) Heger komeka nav kevanekê hevokeka serbixwe be, xal, bangnîşan û pirsnîşan di hundirê kevanekê da dihên danîn.

Ez dê sibehê biçim malê. (Gelo Şêro jî dê bê?) Şêro ma tu dê li vê derê bimînî?

4) Ji bo navê nivîskarên gotar yan pirtûkan

Min Şivanê Kurmanca(Erebê Şemo) di demeka kurt da xwend.

5) Li gel sêxala ji bo beşên jêwergirtinan yên nenivîsî

 “Ji rexê din dora kanî an kevîyên robaran bi spîndaran xemilandî ne . (…) Ji xwe ev spîndarên ha di lêkirina xaniyên wan da bingehekî mezin in.”

Hawar, hejmar: 24

6) Ji bo bêjeyên hevmane, tarîx û pîvanên bergindên hevûdin dihên bikarînan.

Firehîya golê 8 yard (nêzîkî 7,32 m) e. Haya zikê têr ji yê birçî (birsî) tune ye. Kalê min li gor teqwîma hicrî di 1320î (mîladî 1903) da ji dêya xwe bûye. Li mala me çortan (keşk) nemaye. Min televîzyoneka 42 înçî (106,68 cm) kirî.

7) Di nivîsên tîyatroyî da agahdarîyên di warê sehneyê da, her weha yên li ser rewşa tîyatrogeran û tevgerên wan jî di nava kevanekê da dihên nivîsîn.

Mamosta – Kurê min, rabe ser pêyan! Şagird – (Bi tirs li dora xwe dinêre û hêdî hêdî radibe) Kerem bike, mamosta.

8) Gava ku bangnîşan ji bo tinaz, piçûkxistin, heyirîn û hwd dihê bikarînan, di hundirê kevanekê da dihê danîn.

Erê, te her tişt safî kir (!), ew ma. Ka mêrxasê me (!) li kê derê ye?

9) Navber nakeve navbera kevanekê û nivîsa hundirê kevanekê.

10) Gava ku ji bo nîşandana beş yan jî xalên nivîsekê, reqem yan jî tîp bi kar dihên, piştî wan reqem yan jî tîpan bi tenê beşê kevanekê yê girtinê, ango beşê vê nîşandekê yê dawî dihê danîn.

reqem: 1), 2), 3) reqemên romayî: I), II), III) tîp: A), B), C);a), b), c)