Li gel hejmarnavên bi reqeman
Heta niha di nivîsîna kurmancîyê da, gireya tewangê bi çend awayên cuda dihê nivîsîn:
- a) bi apostrofê
(sala 40’î, ji 19’an, ji 1’ê) - b) bi bendikê
(sala 40-î, ji 19-an, ji1-ê) - c) bi navberê
(sala 40 î, ji 19 an, ji 1 ê) - ç) pêvenivîsîn
(sala 40î, ji 19an, ji 1ê)
a) Wekî ku ji nimûneyên jorîn jî dîyar dibe, hin kes di kurmancîyê da apostrofê ji bo jihevveqetandina hejmarnavê û gireya tewangê bi kar diînin.
Lê gireya tewanga hejmarnavan, mêjer û zayenda hejmarnavan nîşan dide û parçeyekî wan bi xwe ye. Gava ku hejmarnav bi tîpan dihên nivîsîn, gireya tewangê ji wan nahê veqetandin. Gava ku bi reqeman dihên nivîsîn jî hewce nake ku em bi apostrofê gireya tewangê ji hejmarnavan veqetînin. Heger mirov gireya tewangê ji hejmarnavan veqetîne, alozî û sergêjî dê zêdetir bibin. Ji ber vê yekê, ya baş ew e ku gava ku hejmarnav bi reqeman dihên nivîsîn, apostrof nehê bikarînan û gireya tewangê û hejmarnav bi hevûdin ve bihên nivîsîn.
b) Tiştên ku me li jorê ji bo bikarînana apostrofê nivîsîn ji bo bikarînana bendikê jî çêdibe ku bihên gotin. Loma, hewce nake ku di nivîsîna kurmancîyê da, hejmarnav û gireya tewanga wan bi bendikê ji hevûdin bihên veqetandin.
c) Gireya tewangê, parçeyekî hejmarnavan e û nabe ku ji wan cuda, bi serê xwe bihê nivîsîn. Loma jihevcudanivîsîna vê gireyê û hejmarnavan ne awayekî minasib e.
ç) Ji agahdariyên jorîn dihê famkirin ku gireya navbirî, parçeyekî hejmarnavan e û formekê dide wan. Loma, ya herî minasib ew e ku gireya tewanga hejmarnavan ji wan nehê cudakirin û bi wan ve bihê nivîsîn.*
* Nimûneyên ji Hawarê: sala 1930î (hejmar: 34), hejmara 40î (hejmar: 41), Adara 1940î (hejmar: 33), sala 1860î (hejmar: 33), sala 1500î (hejmar: 49), sala 1941ê (hejmar: 29), sala 1781ê (hejmar: 43), sala 1802an (hejmar: 27), sala 1942an (hejmar: 40), sala 1943an (hejmar: 40), sala 1914an (hejmar: 35), sala 1925an (hejmar: 30), sala 1847an (hejmar: 54), sala 1938an (hejmar: 37), sala 928an (hejmar: 30), sala 1919an (hejmar: 35), Îlona 1939an (hejmar: 33), (sala 1939an (hejmar: 36)