Nivîsîna tarîxê
Ji bo nivîsîna tarîxê gelek awa hene. Ji bilî tevlihevkirina reqeman û nivîsê, di rêzkirina roj, meh û salê da jî li welatên cuda sîstemên cuda dihên bikarînan.
1) Yek ji wan nimûneyan Amerîka ye. Li Amerîkayê, sîstema ji bo nivîsîna tarîxê ew e ku meh, roj û sal li dû hevûdin rêz dibin.
Ev awa, rêyê li ber şaştêgihîştinê vedike. Lewra ji ber rêzkirinên adetî yên din, mirov dikare bi hêsanî weha têbigihîje ku ev tarîx 3yê îlona 2011an e, yan jî 11ê îlona 2003yan e. Di her du rewşan da, mirov weha tê digihîje ku reqema ku li navê ye, mehê nîşan dide. Lê li gor sîstema navbirî, hejmara ku li navê ye, rojê nîşan dide. Ji ber vê yekê, ev awayê nivîsînê ji bo nivîsîna kurmancîyê ne awayekî minasib e.
2) Awayekî din ew e ku tarîx bi awayê sal, meh û rojê li dû hevûdin rêzkirî dihê nivîsîn, sifirek li ber beşê yekhejmar dihê danîn û her sê beş bi bendikê ji hevûdin dihên veqetandin.
Her çend ev awa ji alîyê hin kesan an welatan ve ji bo nivîsîna tarîxa belgeyan, nameyan û hwd wekî standardeka navneteweyî dihê bikarînan jî di nivîseka normal da, wekî awayekî minasib nahê dîtin. Lewra wekî ku ji nimûneya jêrîn dîyar dibe, hem bikarînana bendikê dibe ku bibe sedema tevlihevîyê hem jî awayê rêzkirina wê ne li gor rêzkirina normal (roj, meh, sal) e.
Ev awa, ji alîyê ISOyê (Rêxistina Navneteweyî ya ji bo Standardîzekirinê) ve wekî awayê standard hatiye pêşnîyazkirin lê di pratîkê da, kêm welat pêgirîya vî awayî dikin. Ji ber vê yekê, di warê nivîsîna tarîxa nameyan ya ji bo derveyî welatî da, ya baş ew e ku mirov pêgirîya awayê nivîsîna wî welatî bike. Heger mirov di warê awayê wî welatî da xwedîyê/a agahdarîyê nebe, ya herî rast ew e ku mirov tarîxê bi navê mehê binivîse.
Di vê nimûneyê da, tu rîsk tune ye ku mirov beşên roj, meh û salê tev li hev bike. Loma ev awa awayê herî fambar e. Lê di nivîsîna kurmancîyê da, ji bo vî awayî divê ku mirov li îzafe û tewangê jî miqate be.
3) Awayekî din jî ew e ku mirov roj, meh û salê bi reqeman li dû hevûdin rêz dike lê xwarexêzê (/) di navbera roj û mehê da datîne û piştî navberekê salê dinivîse.
Lê wekî vê nimûneyê, bi tenê di navbera du beşên tarîxê da, ango di navbera roj û mehê da danîna xwarexêzê ne tercîheka di cihê xwe da ye. Baştir e ku di nava her sê beşan da heman nîşandek hebe.