Pirsnîşan ?

Wekî ku ji navê wê jî dihê famkirin, pirsnîşan ew nîşandek e ku di nivîsê da piştî pirsan dihê danîn.

a) Li dawîya komeka pirsê

Pirsnîşan yekser piştî bêjeya komeka pirsê ya dawî dihê danîn; ango divê ku di navbera wê û bêjeya komekê ya dawî da navber tune be.

Ma te ev eciband? Navê te çi ye? Tu çi karî dikî? Tu ji bo çi hatî Bedlîsê?

b) Di dawîya wan bêje yan jî komekan da dihê danîn ku armanca wan pirskirin e lê ne bi awayê komekên pirsê hatine avakirin.

Elî? Navê te?

c) Ji bo cih, dem, tarîx û rewşên ku nahên zanîn yan jî rewşên ku mirov ji wan ne ewle ye, dihê bikarînan.

ç) Gava ku pirsnîşan di nava kevanekê da bihê danîn, divê ku di navbera kevanekê û bêjeya pêwendîdar da navber hebe.

Kalê wî di 1890 (?)–1952yan da li Dinêserê (?) jîyaye. Li gor gotinan, ew saet û nîvekê (?) bi hevûdin ra peyivîne. Navê xanima ku li te pirsî, Binefş (?) bû.

d) Gava ku pirsnîşan bi tenê bihê danîn

Kalê min di 1890?–1952yan da li Dinêserê? jîyaye. Ev awa gelekî kêm dihê bikarînan.